صلاة وسلاماً علي نَبي ضناني شوقو وشواني شَي
شرّعت في أوّلت بدي بِربنا الفي بقاهو حي
إلهنا الواحد العلِي ولا لو أبا ولا لو اخِي
مُريد وفعال لكُل شئ رجوتو يغفر ذنوبي لي
ثَنيّت قولاً لي نبي محمد الطاهر الزّكي
نِسبتو عدنان ومن قُصي مُصفَّي من فِهري لا لؤَئ
علي الرُّسل فاق خُلُق وزي حاشا موشُوي
الوُحُوش مع الصيد تغاوي غَي نَبع بهامو الزُلال سَي
يعَلّو في الجيش رواهو رَي شَفا المريض ردَّللصِّبَي
يمينو للكرم سِخَي عطاهو فاق وابل الضّحَي
عَلي السُّؤال جودو بِي مَزي ولا بيغاور تبِعلو هَي
وفي العبوس ما ادَّخرلُو شَي ترك نعيم خِيرا قال أفَي
شكت غزالاً علي نَبي تقُولو شوف اليهودي فِي
حجرني لا أَسرَح الوِدي قَعد ضمينا وجرت ياخي
تقول لهم قوموا يابُني دخل في سجني البشير فِدَي
يا صغار تعالو لي كَسِّروا الحِينه من ثدَي
الأَصد علي الطيبَ الرِضي يقول غلام أصغر الجِدي
يمين لِباكي حرام علي ليه تضمِني الهادي يا أُم زوي
جرت تشق الغفار وصَي تقيف علي بابو سيد أُبي
بكي اليهودي اسلم الهدَي عقدلو عقداً ولاهو نَي
نَجابو من مِلَّة الشِّقَي عفا الغزال تلعب أم قِفي
نويت يا ربّي جُود علي تحِلُّو قيداً مَلضوّي في
أشد علي بازِل القِرَي أعَبي أملي البُدار ورَي
أكاري افُوت بام دُيور رِمَي وَالِم خبيِراً يساري بي
أباري للقافلة للغِدَي أصل مقاماً علي التَّكّي
أخُش وَارُد للنّبي التَّحِي أشوف كواكبو التَّضُوي ضَي
واشم زبَادو اليَفُوح علي واذوق رُطاب العَجُو وحِلي
تَجَوّه الخوة لَلعِشي من الصّعيد لا وَرَا الكَري
خصُوص من الضّيقَه لا عطي نهار وِقافنا اب هجير وَدَي
كذا الكبير والصغير جِني تقول حَوَاي ما عليهُن شئ
يقول لك الماحي ياوَلِي بخاف فِعالي القبيح رِدي
رَجَاي فيك ظَنِّي مُو شُوي نهارت الموقِف الشَّني
مَع الصّدّيق يبقو والدي تقول لي هذا الحِمِل علي
علي الحبيب صَلِّي يا وَلِي سَلامي للهادي كُل عَشِي
عدد سحاباً يَصِبلو مِي الجبال والرّمل للحِصي
السِباع والطّير لا الحِدي عَددعلم رَبّنا العَلِي

نعم نعم القام منسرق
زار محمد خير الخلق
يا كريم الحال يتفق
والسان ينطق بالصدق
نزكرك كونك مستحق
الحمد فضلك منبثق
بابك المفتوح ما غلق
ونسألك تيسير الرزق
القلب يا حنان يرق
للرسول بالشوق والعشق
اثني بيك يا نبي الشرق
يا محمد خير الخلق
طه بن عدنان يا حذق
في الوجود قبل ادم خلق
الامين الما بتحمق
جاشا نبي الله ما زمق
وجهو عند الجود ينطلق
ويكرم الايتام بي رفق
وصفو واصل ما بتلحق
كم شحن في بحوو وغرق
حسنو في النبيان باقي شق
ومن جمالهو يوسف فرق
كان بين الناس ان عرق
منهو زاكي الطيب يتعبق
نور جبينو الباهر يبق
وحين يفر تبسيمو البرق
البعير قال جيت منسرق
يا محمد داير العتق
بالعطش والجوع منصفق
حلاهو سار مسرو منطلق
الجذع يبكي ويتخنق
بالحسار والشق متقلق
البكار قدام الخلق
لي رسولكم جات تنسبق
الكرام فرسان الزرق
ضربهم تب تب مو فلق
آل خيبر راسهم زلق
جابم الكرار في ربق
قلبي طال بالشوق متحرق
نيتي فيكم قولاً صدق
راجي ربي الحال يتفق
ونحن وانتم ما نتفرق
يا الرسول لم ناس الشرق
والغرب وابدوم لا سلق
خوة الاسلام حر و رق
يا كريم في الجاه نندلق
قال بخاف الماحي السحق
وفي الفساد والعيب متخمق
لي ذنوباً وازق وزق
ويا الرسول فيكم معتلق

يا عشاق (للشيخ القرشي)
ما حاديت طوال الساق
وا شوقي
*~*~*
بسم الله يا خلاق
يا حي قاسم الارزاق
لي شافع العصاة مشتاق
وحل قيداً مسك في الساق
*~*~*
ثنيت بي الفاق
النبيان على الاطلاق
يوم الناس تقيف اطباق
جاهك يا المكرم حق
*~*~*
الخير لي جودك بيك
جل الباري صلى عليك
دفعوا الجنة كلها ليك
وسدوا النار كرامة ليك
*~*~*
المنصور جميل الصور
نور من نور وخمش من نور
مصباحي الحليم وستور
ساكن طيبة بطن ام سور
*~*~*
طيب العشرة مو حماق
ادعج واكحل الامياق
فر اساننك البراق
وعرقك يا الرسول عباق
*~*~*
لاح لي بريق
وصايب جوفي بي الحريق
يا دمعي اليصب سبليق
على الخضرا التقول دفيق
*~*~*
لاح لي بريق مع البهار
وطالق في حشاي النار
كل ما جاني منو خبار
نيتي اطير مع الطيار
*~*~*
الليلة البريق لاح لي
طرراني اب علامة نبي
والله ان بقيت في الحي
ابرى القود واملي الري
*~*~*
الصلاة والسلام مشروح
كالمسك العبيق تفوح
جابها قريشي للممدوح
قبل الرمشة عندو تروح